KHAWVELA UPC A LO DIN DAN!

KHAWVELA UPC A LO DIN DAN!

-  Robinson Sailo
 Diakkawn

Penticost ni-a Thlarau thianghlim a lo thleng khan Kohhranhote a chenchilhin, thiltihtheihna leh huaisanna a pe a, AD 100-131 inkara ringtute tihduhdahna rapthlak tak pawh kha huaisen takin an hmachhawn a, rêm a hnekin ringtute kha an lo pung tial tial zawk a ni.
Nimahsela, AD 313 kuma Rom lal Constantina a lo nih atang khan Kristiante zalenna a pe a, tihduhdahna a tawp ta a, zalenna chu dik lo takin an hmang ta a ni. Zirtirna dik lo-ah te an peng bo tan ta a ni. Tichuan, Apostole- te thurin an kal bosan tan ta a, Thlarau thianghlim chu a ti ta tial tial a, khawvel hmun hrang hrangah tlem te tein ruah bing ang lekin khawvelah a lo thleng ta. Chuvangin AD 313 leh AD 1900 inkar zawng hi “hun reh” an tih phah ta a ni.
AD 1900 khan khawvel hriat tham turin Thalarau chuan hmun hrang hrangah sulhnu thar an rawn nei leh tan tawh a ni. Kum 1898 khan Rev. Charles F.Parham-a kum 25 mi lek hian chanchinbu “Apostole thurin” tichhuakin a lak man atan chuan “Isaia 55:1 en rawh” tih a ni a, a mawl angreng hle. Ani hian Kansas biala Topoka hmunah, “Bethel tihdamna in” a din bawk a ni. Kum 1900 kum tawp lamah Bethel Bible College a din bawk, zirlai naupang 40 a nei a, an zirlaibu hman chhun chu Holy Bible hi a ni tawp mai.
Bible atangin thupui thlanchhuah bik an nei thin a, tawngtaina nen Lalpa hrilhfiah turin an râwn thin. Tichuan, “Thlarau Thianghlim” tih thupuia a hman lai chuan Penticost nia lo thleng ang ngei chaw ngheiin an dil ta a, ni 10 lai chaw ngheia Lalpa an kar hnuah an zingah Thlarau thianghlim a lo thleng ta a, zirlai 40 te chuan Thlarau changin tawng hriat loh nen an ri ta nuai nuai mai a ni. January 3, 1903 khan a lo thleng ve a, “Isu, ka thla hmangaihtu” tih hla kha tawng dang dangin inrem tak siin an sa ho ta a, an hlim tlang hle. Hemi zan hian amah Rev. F.Parhama ngei pawhin Thlarau a dawng ve ta a, “Swedish” daih a hmang a, Lalpa a fak ta chiam chiam mai a, eng tawng nge a hman tih amah pawhin a hrethiam lo. He Thlarau thianghlim an dawn hian Apostole-te thurinah a hruai lut a, “Trinity thurin an lo vawn thin chu hnawlin Isua chauh” tiin Tawnghriatloh te nen Lalpa’n a tawngtir ang zelin an tawng ta ni.
Dt. 31/12/1910 zanlai inkhawmna-a Thlarau thianghlim lo thleng hian Isua Pathianna leh Ama hminga hnimphuma chan te, Tawnghriatloha tawng te a zirtir a, he zirtirnaah hian a hruai lut ta a ni. Tichuan, zirtirna dik chuan khawvel a tuam thar leh tan a, hetih hunlaia Trinity zirtirna zawm a rawngbawltu lar tak tak te zinga mi ropui tam takte chu Apostole-te thurinah an inlet ta a ni. Tin, Kohhran lian tak tak a lo ding ta a, a lian zualte leh mite hriat hlawh deuh deuh te chu:-
1. Apostolic Faith Church
2. The Church of God
3. The Church of God in Christ
4. The fire Baptist Holiness Church
5. Pentecostal Holiness Church
6. General Assembly of the Apostolic Assemblies
7. The Assembly of God
8. Pentecostal Assemblies of the World
9. Pentecostal Ministerial Alliance
10. Apostolic Church of Jesus Christ
11. Pentecostal Assemblies of Jesus Christ
12. Pentecostal Church Incorporated of the world
Kum 1931 khan pawl lian tak pahnih te, Apostolic Church of Jesus Christ leh Pentecostal Assemblies of Jesus Christ te chu pawl khatah infinin ‘Pentecostal Assemblies of Jesus Christ” an lo din ta luah mai a ni. Hemi pawl lian tak thar lo ding ta leh hetih hunlaia pawl lian leh changtlung ber pawl a ngaih “Pentecostal Church Incorporated of the World” te chu infinkhawm leh zai an rel ta a ni.
Kum 1945 January ni 30-ah St Louis khawpui-ah a tum khatna atan palai 3 ve ve inhmuhkhawmna neiin committee pawimawh tak an nei ta a, a hmasa berin thurin bulpui (Fundamental Doctrine) pawl innghahna tur siam a tul si a, uluk taka tawngtaina nen an sawi ho laiin, an zinga tel ve Rev. T Witherspoon-a chu thlarauin a lo khat a, an committee-na inchhawng hnuai lama office room-ah a chhuk thla vat a, type- writter-in Lalpa a thinlunga thu a rawn thlen thartir chu a chhu chhuak ta mawlh mawlh mai a ni. Hei hi a ni vawiin thlenga kan thurin bulpui chu! He a thu chhut chhuah hi in chhunga Committee-ho hmaah chuan a chhiar chhuak a, lungrual takin an pawm tlang ta a ni.
Ni 20, 1945 (Thawhlehni)-ah St.Louis-ah bawk pawl hnihte chuan an dan leh  inenkawl a tana an hman lai ve ve dahin dan thar leh inenkawlna tur duang a, committee leh huna pawm tlan atan an dah ta a ni. April 17 - 20, 1945-ah a vawi thumna atan committee hona an nei leh a, Headquaters Office tur, Kohhran hming tur leh tul dangte an sawi ho a, Kohhran hming thar tur an sawi ho lai hian inhnialna nasa tak an nei a; Mahse, an inhnial buai lai hian Rev. BH Hite-a chu Thlarau pawlna nasa tak a dawng a, “UNITED UNITED” tiin a tawng chhuak ta vak vak mai a, thlarauin a tawngtir ang zelin mittui nen a au chhuak an hmuh chuan Committee-ho thinlung a khawih hle a ni. Tichuan, an ngaihtuah ho mek pawl hming atan chuan, “United Pentecostal Church” an vuah ta a ni. Pawl hming, Danpui, Thurin leh HeadQuaters hmun tur lamin engkim peih fel vek a ni ta a ni.
General Conference St. Louis khawpui KIEL - AUDITORIUM-ah September ni 20 - 26 inkara hmang turin lungrual takin thu an titlu ta a ni. “United Pentecostal Church” chu khawvel hriatah ni 25, Sept, 1945 niin a lo piang ta ni.

Post a Comment

0 Comments