LÂR LEH LÂR LOH TEHNA

LÂR LEH LÂR LOH TEHNA
                                                   (Kamliana Lhouvum)

Tunlâi chhanah  a tute mai pawh hian làr leh celeb nih hi kan châk ni hian ka hre țhin. Facebook, whatsapp, instagram,adt. han lut i la, khêl loin a hriat theih; mi țhenkhatte tân chuan dik vek kher lo mah se la, a tam zawkah hi chuan a dik chiang mai.

Thuziakmi te, fiamthu thawh thiam te, sawrkar hnathawk te, rawngbâwltute, model te, infiammi te leh mi narân te pawh hian kan tuina line ațang țheuhin intihlâr leh mi hriat hlawh nih kan châk țhin a ang; sipai te leh police țhenkhat te thleng pawhin mahni uniform nên kan in-post ta sup sup mai a nih tâk hi maw!

Tunlâi tleirâwlte lahin bialnu bialpate thlalâk dunna te, inkuah mai duh tâwk loin infawh leh thlalâk sexy tâwk tâwk post-na atân kan hmang lehzêl a, thil mâwi tak a ni lêm lo.

Ka rilru-a thil lo lang țhin chu: heti anga tleirâwl thlalâk sexy leh status zahpuiawm tak tak post țhinte hian nu leh pa leh chhungkhat laina an nei ve lo em ni chu aw ka lo ti ve mai mai țhin a; nge ni ang a, an chhungkaw background-in a zir lo zâwk? Heti anga awm țhin nula leh tlangvâl te hi chu an relationship pawh a rei loin an ințhen leh nge nge bawk țhin tlangpui.

Mi lâr nih kan tumna lamah hian tih hreh kan nei lo a ang țhin; mizo kan nihna ang pawha zahthlâk thil tam tak kan ti fo mai. Ziakmi ni lêm lo, lehkha zir mang lote leh khawi lâi university maha journalism lam zir chhuak lo tih hriat ngawih ngawihten group leh wall-ah thu ropui tak tak, news tharlâm tak takte leh mi thiamte thu ziah sate kan copy leh a, kan post chhâwng leh mai zêl bawk. Khawi lâi model school maha zir chhuak lo tih hriat ngawih ngawihte hian model tak tak teho ai mahin lansarh tumin kan han in-post leh vak vak bawk a, kan ngam huai angreng.

Eng pawh chu ni se, lâr leh lansarh kan tumna kawngah kan thawhrimna chi khatah ngâi ta mai i la; social media-ah hi chuan mahni nihna ang lo pui puia lan tum kan tam si a. Amaherawhchu, ka hriat thiam theih loh leh pawm harsa ka tih chu: mahni țhenawm te, vêng te leh khaw mite pawhin an la hriat mang si loh, mahse, lâr ta viauva inngâi hi kan va tam si êm!

Pu Mafâ-a sawi dân takah Mizoramah ringawt pawh min hre lotu an tam a tih tawh kha; Mizoram khawi lâi hmunah pawh, thingtlâng hmun kilkhâwrah pawh kal i la, kan hming leh nihna miin an hriat chat chat theih loh hi chuan kan la lâr tâwk lo a ni a lo tih tawh kha.

A nih leh nang, Tongkolong, Sangâu, Vairengte, Aizawl, Lunglei, adt. ah va zin chhuak la, i hming sawi la, i nihna leh i hming an lo hre chat chat thei tawh rêng em? Chuti angah chuan Zaithiam Sailova te hi mi hriat hlawh pâwl chu a nih ka ring.

Mizoram hmun kilkhawr chu sawi loh, mahni khua leh vêngte hriat hlawh lo tân mi lâr a nih theih loh hrim hrim. Khai le! Mi lâr nih hi thil namai a ni lo; tunlai rapper te leh zaithiam țhenkhat, tu ma la hriat loh, vawi khat rap/zâina-ah " min lo sêl ve chhên s'u " han tih ringawt te hi a zahthlâk; tu mahin ani kha kan la hmelhriat hma hma a.


Mahni khawvêng, district leh state-ah hriat hlawh i nih hunah i duh leh a rúk têin " E, ka lâr vè dâwn ta"  i ti dâwn a nia. A eng a mah hma-a lo inlâk lâr/celeb a, hnathawh zah nân kan lo hmang a nih phei chuan mi ang lo-ah leh mite hmuhsitin kan la awm thuai dâwn tih hriat reng a țha. Kan lâr tum dân hi dik se, lâr te chu a țha lo pawh a ni lo a; amaherawhchu, lâr nia kan inngaih ang hian mite ngaihah kan ni ve em tih erawh inngaihtuah chian a țul.

Post a Comment

0 Comments